旅遊攻略—氷見
位於北陸地區既氷見市，可能大家都唔會太陌生，因為呢個地方就係著名漫畫家藤子不二雄既故鄉！係城市入面，你會見到好多佢嘅作品，包括忍者亂太郎等。。。而且氷見有一個都幾出名嘅漁市場。由於佢位處富山灣，所以海鮮係相對新鮮。不過你又知唔知，點解富山灣嘅海產會特別肥美？答案就係因為富山灣係兩種水流嘅交匯處，所以會有特別多微生物被海產食用，所以佢哋就特別肥美。
咁究竟係點去咖呢？由高岡出發，乘搭氷見線，太約半小時至45分鐘就會到達！落車之後，轉乘番屋街線巴士，大約25分鐘嘅車程就會到達魚市場。
魚市場入面有分唔同區域，有賣乾貨，海鮮，餐廳嘅區域。係海鮮區入面，有好多唔同大大小小嘅海鮮檔。但要注意，海鮮有分刺身用或煮食用。呢度嘅刺身係必食推介，特別係好似手掌咁大嘅蠔就更加一定要試！而且價錢仲非常合理！如果你好運，仲可以買到好大隻嘅鱈場蟹，價錢只係大約＄100一隻！
食完刺身，仲可以去溫泉區度休息一下。如果你選擇浸腳，費用全免。另外，你亦可以俾錢去總湯到浸溫泉。係總湯入面，人流並唔係十分多，所以都唔需要擔心私隱嘅問題。休息完浸完溫泉，大家可以考慮返去魚市場入面食甜品！如果大家有留意前幾日嘅posts ,應該會記得係金澤東茶園街入邊有間食金箔雪糕嘅鋪頭，係呢個魚市場入面都有一間分店，而且都有金箔清酒賣，係等車嘅時間就可以更加充實啦。另外，傳統嘅日式和果子，同昆布乾，魚乾都係好值得入手嘅手信！
行完魚市場，你可以考慮乘搭巴士前往市中心。不過市中心相對冷清，好多店舖都冇營業，不過如果當好悠閑咁行街都值得嘅。
雖然氷見市唔係一個好大嘅城市，但係如果你想食到肥美新鮮嘅海鮮，呢度絕對值得去！但係呢個城市最多需要逗留半日，咁仲有半日可以去邊呢？想知有咩好提議，就要繼續留意我哋呢個旅遊攻略—北陸地區篇啊！
Search